Sunday, January 19, 2020

കഴിഞ്ഞ കുറച്ചു നാളുകളായിട്ട് എല്ലാ ഞായറാഴ്ചകളിലും ഞാനെന്റെ ഇല്ലത്തേക്ക് പോവലുണ്ട്. അവിടെ മതില് കെട്ടൽ കർമ്മം നിർവഹിക്കാൻ. ശരിക്കും ഈ മതില് കെട്ടൽ എനിക്കശേഷം താത്പര്യം ല്ല്യാത്ത കാര്യായിരുന്നു. പക്ഷെ അത് മറ്റുള്ളോർക്കും കൂടി ബുദ്ധിമുട്ട് ആവാൻ തുടങ്ങ്യപ്പോ ചെയ്യാതെ വഴീല്ല്യാന്നായി.  ഇത്തവണ അവടെ ന്റേം പിന്നേ അപ്പറത്തെ ഇല്ലത്തെ മൂവാണ്ടൻസും മാത്രേ മാവുകളിൽ പൂത്തിട്ടുള്ളൂ. കഴിഞ്ഞ രണ്ടു തവണ പോയപ്പഴും കണ്ണിമാങ്ങ പെറുക്കി കൊണ്ടന്നിരുന്നു ഞാൻ. ഇന്ന് കൊറേ പൊട്ടിച്ചോണ്ടും വന്നു.

കണ്ണിമാങ്ങാ മുളക് ചുട്ട് ഉള്ളിയും ഉപ്പും കൂട്ടി തിരുമ്പി വെളിച്ചെണ്ണ ഒഴിച്ച് കഴിക്കാൻ നല്ല സ്വാദാന്ന് ഞാനിവിടെ വന്നിട്ടാ അറിഞ്ഞേ.  ഉപ്പും ഒരിത്തിരി മുളകുപൊടീം ഇട്ട് അപ്പപ്പോ കൂട്ടാൻ പറ്റണ ഉപ്പിലിട്ടതായിട്ടേ ഞാൻ ന്റെ ഇല്ലത്ത് കണ്ടിട്ടുള്ളൂ. കൊറേ മാങ്ങ ഉള്ളതോണ്ട് രണ്ടു തരത്തിലും ഞാൻ ണ്ടാക്കലുണ്ട്. അച്ഛമ്മക്ക് വല്ല്യ ഇഷ്ടായിരുന്നു അത്. അതുകൊണ്ട് കാണുമ്പഴും കഴിക്കുമ്പഴും ഞാൻ അച്ഛമ്മേ ഓർക്കും.

മഴക്കാലായാൽ കൊറേ തൈകൾ കൊണ്ട് നടണം അവടെ.പതുക്കെ പതുക്കെ അവിടത്തെ വീട് നന്നാക്കണം. എന്നിട്ട് ആഴ്ചയിലോ മാസത്തിലോ അവടെ പോയി താമസിക്കണം. ശരിക്കും ആ വീട് എനിക്കെത്ര അന്യമാണെന്ന് ഞാനോർക്കാറുണ്ട്. സ്വന്തം വീടായിട്ട്കൂടി ഞാനവിടെ ഉറങ്ങിയിട്ടുള്ളത് വിരലിൽ എണ്ണാവുന്നത്രെ ഉള്ളൂവെന്ന് തോന്നണു. മനുഷ്യർക്ക് മാത്രല്ല വീടുകൾക്കും നല്ലതും കെട്ടതുമായ കാലവും സമയവുമൊക്കെ ഉണ്ടെന്നെനിക്ക് തോന്നാറുണ്ട്. ഉടമസ്ഥരുടെ സന്തോഷമോ കളിചിരികളോ ഒന്നും അനുഭവിച്ചറിയാൻ സാധിക്കാത്ത ഒരു വീട്. സ്നേഹം കൊണ്ടല്ലാതെ സ്വപ്നത്തിൽ നിന്നല്ലാതെ ഉണ്ടായൊരു വീട്. അവടെ വാടകക്ക് വന്ന് താമസിച്ച രണ്ടു കൂട്ടർക്കും ആ വീട് നല്ലതേ നൽകിയിട്ടുള്ളൂ. ഉടമസ്ഥക്ക് ഒരു കടലോളം കണ്ണീരുമാത്രം....  ഓർക്കാൻ ഒരു ചിരി പോലും നൽകാതെ..... അതുകൊണ്ടല്ലേ ജെസിബി കൊണ്ട് ഇടിച്ചുനിരത്തി കളയാൻ...എന്നിട്ടവടെ നാലു വാഴ നടാൻ  ഞാനിത്ര ലാഘവത്തോടെ പറയുന്നത് !!!!!!

ആയുസ്സിൽ ബാക്കിയെല്ലാ കാലത്തും കണ്ണീരും കഷ്ടപ്പാടും ആണെങ്കിലും ബാല്യം അത് സന്തോഷോം ചിരിയും മാത്രമാവണം. അത് നൽകുന്ന ഊർജ്ജം മതി ബാക്കിയെല്ലാ കാലത്തേയും അതിജീവിക്കാൻ. അന്ന് കിട്ടാത്ത സ്നേഹം സംരക്ഷണം സന്തോഷം ഒക്കെ പിന്നേ എപ്പോഴൊക്കെ കിട്ടിയാലും പൂർണ്ണതയില്ലാത്ത പോലെയാവും.
അറിയില്ല ഒരുപക്ഷെ എന്റെ കുറവായിരിക്കാം ഞാനിങ്ങനെയൊക്കെ ചിന്തിക്കുന്നതും വിശ്വസിക്കുന്നതും. അനുഭവാണല്ലോ ഓരോന്നും വിശ്വസിപ്പിക്കുന്നത്. അല്ലെ?????

അതൊക്കെ പോട്ടെ. കഴിഞ്ഞത് പറഞ്ഞോണ്ടിരുന്നിട്ട് എന്താ കാര്യം. All is well. എല്ലാവരും നന്നാവട്ടെ. എല്ലാവർക്കും നല്ലത് വരട്ടെ.
















6 comments:

  1. എല്ലാവർക്കും നല്ലതുവരട്ടെ എന്ന് നമ്മൾ ആത്മാർത്ഥമായി ആഗ്രഹിക്കുമ്പോൾ നമുക്കും നല്ലത് വരും ഉമച്ചേച്ചീ :-)

    ReplyDelete
  2. മാങ്ങ കൊത്തി പൊടിച്ച് ഉള്ളിയും അരിഞ്ഞിട്ട് ഉപ്പും , വെളിച്ചെണ്ണയും , മുളകും ചേർത്ത് കൈ കൊണ്ട് നന്നായി ഇളക്കി എത്രമാത്രം കഴിച്ചിട്ടുണ്ട്.
    സ്നേഹത്തോടെ പ്രവാഹിനി

    ReplyDelete
  3. മാങ്ങാ നൊസ്റ്റു.കണ്ണിമാങ്ങാ മുളക് പെരുത്തിഷ്ടം. വീട് ബാല്യം എന്നിവ ഇഴപിരിയാത്ത ഓർമ്മകൾ കൊണ്ട് ബന്ധപ്പെട്ടതല്ലെങ്കിൽ ഇടിച്ചിടാൻ എളുപ്പമാണ്.

    മനസ്സിൽ നിന്നു നേരിട്ട് മഷിയിലേക്കുള്ള എഴുത്ത്. ഭാവുകങ്ങൾ.

    ReplyDelete
  4. ബാല്യകാല അനുഭവങ്ങൾ അയവിറക്കി
    പിന്നീട് കിട്ടുന്ന സൗഭാഗ്യങ്ങളുടെ മാറ്റ് ഒട്ടും
    കുറക്കേണ്ടതില്ല കേട്ടോ ഉമേ

    ReplyDelete
  5. ദൈവം ചില കൈവിട്ട കളി കളിക്കും ഇടക്ക്. കഴിഞ്ഞ കാര്യങ്ങൾ എല്ലാം അതിൽ കൂട്ടിയാൽ മതി.

    എല്ലാവരും നന്നാവട്ടെ. എല്ലാവർക്കും നല്ലത് വരട്ടെ.. ചേച്ചിക്കും നല്ലത് വരട്ടെ

    ഇഷ്ടം

    ReplyDelete
  6. ഉമേയ് ഞാൻ ഇതൊന്നും കണ്ടില്ലാരുന്നു ട്ടാ.എന്തിനാ ഓരോ തവണ പോകുമ്പഴും ഇത്രേം കണ്ണിമാങ്ങ പൊട്ടിക്കണേ. ഇനി അതിൽ പഴുക്കാൻ വല്ലോം കാണോ??പണ്ട് പോസ്റ്റിയിരുന്ന ആ വഴിയും മഞ്ഞും ഒക്കെ ഈ വീടിന്റെ ആല്ലേ??

    ReplyDelete